Veturado

Adreso

La kongresejo estos Seattle Pacific University.

Notu, ke troviĝas pluraj universitatoj en Seatlo, inkluzive de "Seattle University". Certigu, ke vi iros al Seattle Pacific University.

Ne ĉiuj konstruaĵoj en la kampuso havas adresojn. La ĝenerala adreso de la kampuso, taŭga por GPS-navigilo aŭ mapoprogramo, estas:

3307 3rd Avenue West
Seattle, Washington
Usono

Enskribiĝo

La enskribado komenciĝos ĵaŭdon tagmeze kaj daŭros ĝis la fino de vendredo. Estas preferinde, sed ne necese, enskribiĝi inter tagmezo kaj 19:00 iun el la du tagoj. La plejmulto de partoprenantoj alvenos vendredon ĉar tiam komenciĝos la ĝenerala programo.

Por enskribiĝi, iru la konstruaĵo Moyer Hall, kiu estas n-ro 38 en la jenaj kampusaj mapoj:

Transportmanieroj

Jen ĝeneralaj informoj pri transportmanieroj en Seatlo:

  • Taksioj: Yellow Cab estas fidinda taksifirmao; oni povas peti veturon telefone aŭ per ĝia retpaĝaro.
  • Uber/Lyft: Oni povas uzi la preztaksilon de Uber kaj la preztaksilon de Lyft por kompari prezojn.
  • Publika transporto:
    • Sound Transit funkciigas Link Light Rail, trajnon konektantan Seatlon kun la flughaveno. Pri pagoj vidu sube.
    • King County Metro Transit ofertas busveturojn en Seatlo; vi povas uzi ĝian Veturplanilon aŭ Google Maps por trovi vojojn alternativajn al tiuj priskribitaj sube. Pri pagoj vidu sube.
    • La senpaga saĝtelefona aplikaĵo OneBusAway donas aktualajn informojn pri alvenoj de busoj kaj trajnoj en la seatla regiono.
    • Se vi alvenos aŭ foriros inter noktomezo kaj 05:00, ni rekomendas ne uzi publikan transporton ĉar funkcios malmultaj trajnoj kaj busoj.

Atingi la kongresejon

Aviade

La plej proksima granda flughaveno estas Seattle-Tacoma International Airport (SEA), al kiu flugas ĉiuj grandaj usonaj flugfirmaoj kaj multaj internaciaj.

Estas kelkaj manieroj iri de la flughaveno al Seattle Pacific University:

  • Per taksio: La veturo daŭros proksimume 30 minutojn kaj kostos proksimume $50 (kun kelkdolara gratifiko laŭ usona kutimo). La flughaveno havas ejon, kien iradas liberaj taksioj.
  • Per Uber/Lyft: La prezo dependas de la horo sed estos proksimume $40-$50. La flughaveno havas ejon por ekveturoj de tiaj veturfirmaoj (sekvu la ŝildojn por "Rideshare").
  • Per luita aŭto: Multaj firmaoj luas aŭtojn ĉe la flughaveno. Por gravaj informoj pri vojoj, trafiko kaj parkumado vidu la rubrikon "Aŭte" sube.
  • Per publika transporto:
    1. El la flughaveno sekvu la ŝildojn por la trajno "Link Light Rail".
    2. Alveninte al la stacio de Link Light Rail, iru al biletmaŝino kaj aĉetu unudirektan bileton al University Street Station (ne University of Washington). (Pri pagoj por Link Light Rail vidu sube.)
    3. Iru en la trajnon kun la direkto "University of Washington".
    4. Eliru la trajnon ĉe University Street Station. La veturo daŭros ĉ. 30 minutojn.
    5. Sekvu la ŝildojn al la elirejo ĉe la vojkruco de 3rd Avenue kaj Seneca Street.
    6. Iru laŭ iu el la jenaj buslinioj. (Pri buspagoj vidu sube.)
      • Ĉe la kontraŭa stratangulo de 3rd Avenue kaj Seneca Street estas bushaltejo, de kie vi povas iri laŭ linio 3, 4 aŭ 29 al SPU.
      • Antaŭ vi, trans 3rd Avenue kaj supre laŭ Seneca Street, estas bushaltejo, de kie vi povas iri laŭ linio 13 al SPU.
    7. Eliru la buson ĉe Dravus Street. La veturo daŭros ĉ. 30 minutojn. La ĉefa parto de la kampuso de SPU, kiu inkluzivas Moyer Hall, estos ĉe la flanko de la strato kontraŭ tiu, kie vi eliros la buson.

Trajne

King Street Station (SEA), en la centro de Seatlo, estas la loka stacio de Amtrak, la usona reto de pasaĝeraj trajnoj. Al Seatlo iras linioj devenantaj de Ĉikago, Losanĝeleso kaj Vankuvero.

Por iri de la stacidomo al Seattle Pacific University:

  • Per taksio: La veturo daŭras proksimume 15 minutojn sed povas esti pli longa pro trafiko. La distanco estas proksimume 9 km (6 mejloj).
  • Per Uber/Lyft: La prezo dependas de la horo sed estos proksimume $13-$18.
  • Per publika transporto:
    1. El la enirejo de la stacidomo ĉe South Jackson Street, iru dekstren kaj marŝu laŭ South Jackson Street ĝis vi transiros 4th Avenue South.
    2. Turnu vin maldekstren por transiri South Jackson Street.
    3. Transirinte South Jackson Street, turnu vin dekstren kaj iru al la bushaltejo antaŭ la vendejo Bartell Drugs.
    4. Iru laŭ buslinio 1, 7 aŭ 36.
    5. Eliru la buso ĉe Seneca Street. La veturo daŭros ĉ. 5 minutojn.
    6. Iru laŭ iu el la jenaj buslinioj:
      • De la sama bushaltejo, iru laŭ linio 3, 4 aŭ 29.
      • De la bushaltejo ĉe la kontraŭa flanko de Seneca Street, iru laŭ linio 13.
    7. Eliru la buson ĉe Dravus Street. La veturo daŭros ĉ. 30 minutojn. La ĉefa parto de la kampuso de SPU, kiu inkluzivas Moyer Hall, estos ĉe la flanko de la strato kontraŭ tiu, kie vi eliros la buson.

Buse

Greyhound

Greyhound Lines havas busliniojn tra Usono kaj Kanado. Ĝia seatla stacio estas proksime de la urbocentro.

Por iri de la stacidomo al Seattle Pacific University:

  • Per taksio: La veturo daŭras proksimume 15 minutojn sed povas esti pli longa pro trafiko. La distanco estas proksimume 9 km (6 mejloj).
  • Per Uber/Lyft: La prezo dependas de la horo sed estos proksimume $13-$17.
  • Per publika transporto:
    1. De la bushaltejo trans la fervojo, iri laŭ linio 101 aŭ 150. (Pri buspagoj vidu sube.)
    2. Eliru ĉe University Street Station. La veturo daŭros ĉ. 10 minutojn.
    3. Sekvu instrukciojn 5-7 sub "Aviade" supre.

BoltBus

BoltBus havas busliniojn al Seatlo de urboj ĉe la okcidentaj marbordoj de Usono kaj Kanado. La busoj haltas ĉe 5th Avenue South en la Internacia Kvartalo, proksime de la urbocentro.

Por iri de la bushaltejo al Seattle Pacific University:

  • Per taksio: La veturo daŭras proksimume 15 minutojn sed povas esti pli longa pro trafiko. La distanco estas proksimume 9 km (6 mejloj).
  • Per Uber/Lyft: La prezo dependas de la horo sed estos proksimume $13-$18.
  • Per publika transporto:
    1. Marŝu norden laŭ 5th Avenue South ĝis la angulo de 5th Avenue South kaj South Jackson Street.
    2. Turnu vin maldekstren, pasu antaŭ Union Station, kaj haltu antaŭ ol transiri 4th Avenue South.
    3. Turnu vin dekstren por transiri South Jackson Street.
    4. Sub "Trajne" supre, sekvu instrukcion 3 kaj la postajn.

Ŝipe

Clipper Vacations ofertas pramŝipajn veturojn al piedirantoj de Friday Harbor, Vaŝingtonio, kaj Viktorio, Brita Kolombio. La seatla ŝipejo de Clipper Vacations estas ĉe 2701 Alaskan Way en la centro de Seatlo.

Por iri de la ŝipejo al Seattle Pacific University:

  • Per taksio: La veturo daŭras proksimume 15 minutojn sed povas esti pli longa pro trafiko. La distanco estas proksimume 6 km (4 mejloj).
  • Per Uber/Lyft: La prezo dependas de la horo sed estos proksimume $11-$16.
  • Per publika transporto:
    1. De la ŝipejo iru al la vojkruco de Alaskan Way kaj Vine Street (la plej proksima vojkruco).
    2. Marŝu laŭ Vine Street, trans 3 stratoj, supren. Poste vi estos transirinta 1st Avenue.
    3. Poste, pro variemaj bushoraroj, estas unu aŭ du ebloj:
      • 15:45-18:45 (nur lundo-vendredo)
        1. Turnu vin maldekstren kaj iru al la bushaltejo ĉe 1st Avenue antaŭ Cedar Street.
        2. Iru laŭ buslinio 29. (Pri buspagoj vidu sube.)
        3. Eliru la buson ĉe Dravus Street. La veturo daŭros ĉ. 15 minutojn. La ĉefa parto de la kampuso de SPU, kiu inkluzivas Moyer Hall, estos ĉe la flanko de la strato kontraŭ tiu, kie vi eliros la buson.
      • Iam ajn
        1. Pluiru rekte (ne plu supren) ĝis 3rd Avenue.
        2. Iru al la bushaltejo ĉe la kontraŭa flanko de 3rd Avenue, maldekstre de vi.
        3. Iru laŭ buslinio 3, 4 aŭ 13. (Pri buspagoj vidu sube.)
        4. Eliru la buson ĉe Dravus Street. La veturo daŭros ĉ. 20 minutojn. La ĉefa parto de la kampuso de SPU, kiu inkluzivas Moyer Hall, estos ĉe la flanko de la strato kontraŭ tiu, kie vi eliros la buson.

Aŭte

Interŝtata Ŝoseo 5 estas la ĉefa vojo tra la urbo, sed la ŝtata Departemento pri Transporto planas fermi la nordenajn koridorojn dum la kongresa semajnfino (de 20:00 vendredon ĝis 05:00 lundon). La koridoroj estos parte fermitaj de la flughaveno ĝis la urbocentro kaj tute fermitaj en la centro. Se vi iros al la kongresejo post 20:00 vendredon kaj planas mem stiri aŭton, atendu multan trafikon! Ni do rekomendas, ke vi uzu GPS-navigilon aŭ poŝtelefonan mapoprogramon por gvidi vin baze de la efektiva trafiko.

Ni tamen povas proponi kelkajn ĝeneralajn konsilojn. Penu aranĝi vian alvenon en Seatlon tiel, ke vi evitos la premperiodan trafikon. Se vi alvenos dum la premperiodo, evitu Elirejon 167 (al Mercer Street) de Interŝtata Ŝoseo 5. Anstataŭe eliru laŭ Elirejo 166 (al Olive Way) irante norden aŭ Elirejo 169 (North 50th Street) irante suden.

Parkumado en la kampuso estas senkosta somere. La plej proksima al Moyer Hall parkumejo estas Dravus Lot (n-ro 45 en la kampusaj mapoj). La enirejo estas ĉe la vojkruco de 4th Avenue West kaj West Dravus Street.

Pagi por publika transporto

Link Light Rail

Stacioj de Link Light Rail havas biletmaŝinojn, kiuj akceptas kontanton (dononte restmonon), MasterCard kaj Visa. La prezo de unudirekta bileto de la flughaveno ĝis University Street Station estas $3 por veturontoj aĝaj pli ol 18 jarojn kaj $1.50 por tiuj aĝaj 6-18 jarojn; infanoj 5-jaraj kaj pli junaj veturas senpage. Se vi havas ORCA-karton kun sufiĉa kredito, por pagi vi povas meti ĝin kontraŭ iun el la flavaj skaniloj enironte la trajnon anstataŭ aĉeti bileton (vidu sube pri ORCA-kartoj). Por ke la karto estu ĝuste debetita, vi devos reskani ĝin elirinte la trajnon.

Busoj

Busoservojn en Seatlo provizas du institucioj: King County Metro (purpuraj, verdaj kaj ruĝaj busoj kun lokaj linioj) kaj Sound Transit (bluaj-blankaj busoj kun interurbaj linioj). King County Metro funkciigas ĉiujn busliniojn rekomendatajn en ĉi tiu paĝo.

En busoj de King County Metro, la prezo de veturo estas $2.75 por veturontoj aĝaj pli ol 18 jarojn kaj $1.50 por tiuj aĝaj 6-18 jarojn; infanoj 5-jaraj kaj pli junaj veturas senpage. Enirante la buson, pagu per kontanto aŭ ORCA-karto (pri tio vidu sube).

Se vi pagos per kontanto, metu iun ajn kombinaĵon de biletoj unudolaraj kaj ofte uzataj moneroj en la monskatolon; restmono ne estas donata. Vi povas peti de la ŝoforo paperan bileton uzeblan por transiri al aliaj busoj de King County Metro senpage ĝis la indikita horo.

Se vi pagos per ORCA-karto, metu ĝin kontraŭ la skanilon (ne reskanu ĝin elirante la buson). Vi povos transiri senpage al busoj de King County Metro dum la venontaj du horoj, sed ankoraŭ skanu la karton enirante la sekvan buson.

ORCA-karto

Vi povas pagi por veturoj de Link Light Rail aŭ busoj per karto "ORCA", aĉetebla de biletmaŝinoj en stacioj de Link Light Rail. La ORCA-karto estas konvena kaj nenecesigas, ke vi havu la ĝustan kontanton por busoj, sed kostas $5 krom tiom da kredito, kiom vi volas aldoni. Vi povas tuje realdoni al via kredito per biletmaŝinoj, kiuj vendas ORCA-kartojn.

Speciala helpo

Se vi volas, ke oni gvidu vin de la flughaveno per publika transporto, aŭ se vi havas specialajn veturajn bezonojn, bonvolu kontakti nin.

Se vi bezonas pli urĝan helpon, telefonu al Jordon Kalilich (+1-206-457-9213).

Mapoj